Du häss mich ens jefrooch, wat ich für't bessre Levve heelt. Dat vun nem Kettehung oder dat vou dämm, dä bettelt, streunt un stiehlt. Met allen Konsequenze: Narbe, Fooßtritten, Einsamkeit un su. Em Vergleich met dämm vun dämm, dä zwar nie hungert, doch dä niemohls fruh. Ich lauf he römm en Brindisi, ming Flugzeug jeht eez koot noh vier. 'sch sinn mich em Schaufenster jespejelt un sinn hart uss, denke ich mir. Met Sonnebrille un unrasiert un – logo – brung noh dä zwei Mohnt, doch ennedrin ahm zittre, Kloß em Hals, weil dat he's unjewohnt. Merkwürdige Zustand ess dat, doch wie off hann ich en mir jewünsch, wie off mich insjeheim jestreubt, die dausend Klözz ahm Bein verwünsch? Künnt ich bloß knaatsche – richtich kitschisch – doch dat hann ich verlernt. Wat ess passiert? Wie wigg benn ich vun Start un Ziel entfernt? 'sch hann keine Hunger, doch ich esse – ejal wat – als Alibi, domet ich drinke darf un frooch mich: "Jung, wat deit dir eig'ntlich wieh? Häss de dich irjendwo verfrans? Häss do dich irjendwo verdonn? Su wie de dostehß, sollt mer meine: Dämm kann't doch nur blendend jonn. Ich benn allein, endlich. Doch, wat soll dat jetz? Ich benn allein, endlich - endlich allein! Do wohr dat Bastard-Rudel en Piräus, Samsdaachmorje öm Aach. "Die hann't jeschnallt, die ärm Säu", hässte leis wie nevvebei jesaat. Un ich daach ahn domohls, als mir noch die, die kein Övvermacht beseech, als jed Berührung noch ne Stromstoß, jede Bleck bengalisch Leech. Wenn't och ne Aurebleck nur woor, jet dovunn ess noch immer do. Jenooch dä Alptraum nit ze levve, en dämm ich mich nit mie wooch, die Power loszelosse, die do mir selvs jetz noch reichlich jiss, en dämm en Macht rejiert, die't schaff, dat mer et Wichtigste verjiss.